Nagasakit
duman ya ulo ni Ex-Kapitan ka ugtas! Indi sa rason nga nag-abot duman ya
tingadlaw kag indi na sya ka sab-ug ka palay kag mais, kundi hay asta dukaron
indi pa magarab kag matapas ang ana nga mga tanom nga pwede dun daad mapadalawat
kag makasapin-sapin sa tiempo tig gulutom.
Natabuan
man nga sa pihak nga bahin, tagtaganay duman ka 4P’s sa munisipyo kag
tag-trienta mil para sa mga biktima ka bagyo Yolanda. Ano pa abi ya huna-hunaun
ta. Tiba-tiba duman ang mga nakabaton ka grasya, kag syempre, pareho katung
nagligad, nagbayad utang duman sanda, bakal ka mga kinahanglanon sa balay kag
ang iban nga palahubog nakalag-ok duman ka manamit kag mainit-init nga lipid.
Pero
samtang nagakalipay ya mga nagrasyahan, si Ex-Kapitan nagaugtas gali hay sya
nawad-an ka mga manug-garab kag manugtapas. Paano abi hay waay duman it malihog
ubra sa kampo hay tanan busog duman sa bubod nga ginwisik ka gobyerno.
Sang-una
katung waay pa dyang 4P’s kag grasya ka bagyo, aga palang hitso don ya mga ulubrahon
sa kampo. Indi mo don kinahanglan tawgon ya mga mamumugon hay aga pa, tanda don
mismo mapalapit para matapos don ya ulubrahon. Pero dukaron, layo don sa patad
ya naabot nga batasan ka iban. Nagatinamad don kung ang bulsa may dyan, pero
kun hubas don gani, baw nagkalamurag-muragan.
Ginmato-mato
dulang ni Ex-Kapitan, imaw ya ana nga asawa kag kabataan nga edukada, ang
pagtapas ka mais kag paggarab ka anda nga palay. Samtang ya pamilya nya
gapinamalhas ubra kag sa initan gasulay, baw ya mga gingrasyahan, sa balay lang
gapahunay-hunay.
Pila
man ka semana kag natapos man ya ulubrahon sa uma. Pagkatapos padalawat ka anda
binakasan, si Ex-Kapitan ang pamilya dulang ya ginpasalamatan.
Asta
nag-abot ya isa ka aga, may bata nagpanawag sa bintana.
“Kap!
Kap!”
“Op!
Maano ka?”
“Mahulam
daad si Nanay bugas, Kap!”
Ay
abaw! Si Ex-Kap man gali ang dalalaganan kung ubos don ya kwarta kag may
kinahanglan.
***
Kun
kwarta ya nagapabakas sa tawo, kwarta man ya rason para magtinamad ang mga
tonto.
- 3:46 AM
- 0 Comments
