Biernes duman nga adlaw. Makita mo naman si Sir Burnok nga naga pungko sa higad ka karsada samtang nagahulat ka tawo nga mabakal ka ana nga tatlo ka bilog nga manok. Halin pa tana sa malayo nga barangay kag Dumarao kag nagpanaug pa sa banwa para magbaligya lang ka ana tatlo ka bilog nga manok. Daw kada Biernes, indi guid magpaulihi si Sir sa baligyaanay manok sa tinda.

Duro guid ang nagapamangkot kun insa man gapinamaligya tana si Sir Burnok ka manok nga insakto man gani ang sweldo ka maestro—masustineran man ang pang-adlaw-adlaw na nga kinahanglanon sa panimalay.

Tigpiligado dun sa bukid. Hambal gani ka mga taga-tuya, ang mga maestro kag maestra lang ka dya ang indi ka batyag ka kapigaduhon hay nagasweldo tanda pagkatapos ka bulan. Parihus sa pagpin-ot ka kabuhi ka mga taga-bukid, nagsunod man sa kapigaduhon si Sir. Ambot, ah, maestro man sya gani. Hambal gani ka iban, diin tana dya bala gakadto ana nga kwarta hay pinamaligya man tana gihapon ka manok kada biernes ang ana ubra para masustineran ang pang-adlaw-adlaw na nga kinahanglanon.

Nagpamigado lang si Sir Burnok halin tung ginbag-o dun ka DepEd ang sistema kun paano bul-on ang sweldo ka mga public school teachers. Kun sang-una kinahanglan mo pa mag-adto sa division office para lang mabuol imo sweldo, dukaron tana de ATM don. Pindot-pindot ka dulang sa ATM, gwa don dayun ang sweldo. Baw! Bangud sa generation gap, daw waay guid ka sabay si Sir sa bag-o nga sistema ka DepEd pag-abot sa bul-anay sweldo. Daw medyo indi gani si Sir kamaan mag-gamit ka cellphone, paano pa ayhan kung mag-withdraw don tana sa ATM.

Pulo na ka bulan halin katung gin-implementar ka DepEd ang sistema sa swelduhanay. Kung ya mga co-teachers tana ni Sir may mga grocery itemsdon nga bitbit  kada katapusan bulan halin sa city, si Sir tana halin sa tinda ka Dumarao nagpinamaligya ka ana nga manok nga lapit dulang maubos. Ulihi dun tana nabal-an ka tanan ya rason ka kapigaduhon ni Sir Burnok.

Sa likod ka nabal-an ka tanan nga basi ginapang-bisyo tana ni Sir ya ana nga sweldo hay pati tana mga manok na dalasa tana pamaligya don kada Biernes, ulihi don tana naman-an nga nahadlok lang gali tana si Sir nga mag-withdraw ka ana nga sweldo hay natalawan tana magpindot sa ATM. Indi tana kuno kamaan maggamit ka ATM. Nano man tana si Sir, nahadlok tana mahuy-an kaysa sa magutuman.

Hamak mo, pulo ka don tana ka bulan nga waay ni Sir kabuol ka ana nga sweldo sa ATM. Hay karun, nag-abot ya tingadlaw.Ubos duman ya manok na kag waay dun sa it inugbaligya. Ubos duman palay na. Nagsunod man ya bulsa na sa paghubas ka bubon. Bisan balinghoy dulang nga pamahawun, waay don guid it kalalihon. Mantinir dulang si Sir ka abalong nga ginluy-ahan kada aga. Ang lain paguid, pati ya ginatubuan ka abalong nga lupa, gaamat-amat duman ka litik bangud sa tingadlaw.

Kun waay pa tana nagutuman si Sir, waay guid tana kamarasmas nga naunahan lang sa gali ka kahadlok na magkapot sa ATM. Hay karun, may dapat sya nga pilian. Mapatay sa nga nagutuman o mahuy-an.

Pagka-aga, nagsakay si Sir sa Ceres (bus) pakadto sa city . Nagkadto sya sa Landbank sa Passi. Una, gaduha-duha pa si Sir, eh. Kita na palang ya ATM booth, daw mataririt dun sa pabalik. Hay tuya duman sa, pawala lang si Sir nga indi sa kamaan maggamit ATM samtang gapalapit sa ATM booth. Bisan gakudog, gin-insert na ya cash card kag ginsunod malang ya instruction, waay man sa nahuy-an.

Hay daw mga pulo man ka bulan nga waay nakasweldo si Sir, baw nagtiriripo ana sweldo sa cash card kag naka-withdraw tana sya sulusobra sa syen mil (P100,000.00), eh. Tiba-tiba tana si Sir lagaw sa Gaisano.

Pauli si Sir sa Dumarao bitbit syen mil. Ginkapital ni Sir sa negosyo ang kwarta. Kag kung katuya manugbaligya lang sya manok sa biernesan, dukaron tana dun ang nagapangkumpra kag nagakadlaw dulang kung madumduman kung diin ang tanan nag-umpisa.